តើ AR​ ឬ VR ​គឺជាអ្វី?​

AR (Augmented Reality) គឺជាបច្ចេកវិទ្យាដែលបង្កើតឡើង ដើម្បីអនុញ្ញាតឱ្យអ្នកប្រើប្រាស់ទទួលយកនូវបទពិសោធន៍ពាក់ព័ន្ធទៅនឹងឌីជីថល តាមរយៈឧបករណ៍បច្ចេកវិទ្យាដូចជា ទូរសព្ទដៃ​ កាមេរ៉ា ឬកម្មវិធីណាមួយនៅលើទូរសព្ទដៃ ដែលអាចជារូបភាព សំឡេង វីដេអូ និងក្រាហ្វិក ហើយដាក់បង្ហាញព័ត៌មានទាំងនោះទៅលើទិដ្ឋភាពជាក់ស្ដែង។ 

VR (Virtual Reality) គឺជាបច្ចេកវិទ្យាដែលប្រើប្រាស់ក្នុងការបង្កើតនូវពិភពនិម្មិតតាមរយៈកុំព្យូទ័រដែលរចនាឡើងអាចមើលបាន ៣៦០ ដឺក្រេ ហើយអនុញ្ញាតឱ្យអ្នកប្រើប្រាស់ធ្វើទំនាក់ទំនងជាមួយនឹងវត្ថុ និងមនុស្សនៅក្នុងពិភពនិម្មិត តាមរយៈកាសស្តាប់ ឧបករណ៍ពាក់ភ្នែកជាដើម។

សារសំខាន់របស់ AR និង​ VR នៅក្នុងវិស័យអប់រំ​៖ 

បច្ចេកវិទ្យា AR​ និង VR នៅក្នុងវិស័យអប់រំបានផ្តល់នូវឱកាសឱ្យសិស្សានុសិស្ស​ទទួលបាននូវបទពិសោធន៏ថ្មីៗ ប្រកបដោយភាពស៊ីជម្រៅនិងទូលំទូលាយ។ ដោយបច្ចេកវិទ្យានេះមិនត្រឹមតែបង្កើតស្ថានភាពដូចទៅនឹងទិដ្ឋភាពជាក់ស្ដែង ទៅជាទម្រង់ពិភពឌីជីថលប៉ុណ្ណោះទេ ហើយថែមទាំងអនុញ្ញាតឱ្យអ្នកប្រើប្រាស់ទទួលបាននូវបទពិសោធន៍ថ្មីស្រឡាង ដើម្បីផ្សាភ្ជាប់ក្នុងការអនុវត្តជំនាញផ្សេងៗទៀតផងដែរ។ ឧទាហរណ៏ ៖ និស្សិតពេទ្យអាចអនុវត្តការវះកាត់ដោយប្រើប្រាស់បច្ចេកវិទ្យា VR បាន​ដោយមិនចាំបាច់បារម្មណ៍ពីការវះកាត់អ្នកជំងឺខុសបច្ចេកទេស ឬនិស្សិតវិស្វករអាចដោះស្រាយពេលម៉ាស៊ីនមានបញ្ហាដោយមិនចាំបាច់ប្រឈមមុខនិងគ្រោះថ្នាក់អ្វីមួយឡើយ។ 

មិនតែប៉ុណ្ណោះ សិស្សា​នុសិស្សក៏អាចទទួលបាននូវមេរៀនថ្មីៗ ដែលពួកគេមិនធ្លាប់ទទួលបាននៅក្នុងថ្នាក់រៀនពីមុនមក ដូចជាការរៀនទាក់ទងពីកន្លែងប្រវត្តិសាស្រ្តណាមួយ ដែលពួកគេមិនចាំបាច់ធ្វើដំណើរទៅដល់ទីកន្លែងជាក់ស្ដែង ដើម្បីស្វែងយល់នោះឡើយ ព្រោះបច្ចេកវិទ្យា VR អាចផ្តល់ព័ត៌មានឱ្យអ្នកប្រើប្រាស់គ្រប់គ្រាន់ និងគ្រប់ទម្រង់តាមតម្រូវការដែលពួកគេចង់បាន​។

បច្ចេកវិទ្យាទាំងពីរនេះ​ ត្រូវបានយកទៅប្រើប្រាស់នៅក្នុងកម្មវិធីសិក្សាដូចជា​៖​

1. វិទ្យាសាស្ត្រ បចេ្ចកវិទ្យា វិស្វកម្ម

បច្ចេកវិទ្យា AR and VR ​អនុញ្ញាតឱ្យនិស្សិតស្វែងយល់ពីគំនិត ទ្រឹស្តីវិទ្យាសាស្រ្ត និងស្វែងយល់ពីហេដ្ឋារចនាសម្ព័ន្ធ តាមរយៈបច្ចេកវិទ្យា3D ​ដែលនេះអាចជំរុញនូវប្រសិទ្ធភាពនៃដំណើរការផលិតកម្ម។ 

2. ផ្នែកវេជ្ជសាស្រ្ត

បច្ចេកវិទ្យា AR​ និង VR ​នៅក្នុងវិស័យសុខាភិបាលអាចអនុញ្ញាតឱ្យនិស្សិតពេទ្យទទួលបាននូវការបណ្ដុះបណ្ដាលដើម្បីអនុវត្ត​ និងបង្កើតផែនការមុនពេលវះកាត់ឱ្យមានភាពងាយស្រួល និងដូចជាពិតៗដោយមិនមានការព្រួយបារម្មណ៍ពីហានិភ័យអ្វីមួយឡើយ។ 

3. ការរៀនភាសា

បច្ចេកវិទ្យា AR និង VR អាចធ្វើឱ្យការរៀនភាសាមានភាព​ច្នៃប្រឌិត​ និងទាក់ទាញជាងមុន ដោយសិស្សអាចអនុវត្តការនិយាយពីគ្រប់ទីកន្លែងបាន ​និងបង្កើតរបៀបរៀនតាមចំណង់ចំណូលចិត្តរបស់ខ្លួនបាន។ 

4. ប្រវត្តិសាស្ត្រ និងវប្បធម៌

បច្ចេកវិទ្យា AR និង VR អាចអនុញ្ញាតឱ្យអ្នកធ្វើដំណើរកម្សាន្តតាមបែបពិភពនិម្មិតទៅកាន់អតីតកាល ឬអនាគតបាន។ សិស្សអាចរុករកកន្លែងប្រវត្តិសាស្រ្ត ឬស្វែងយល់អំពីវប្បធម៌ផ្សេងៗទៀតដោយពុំចាំបាច់ចាកចេញពីថ្នាក់រៀនរបស់ពួកគេឡើយ។