ការពណ៌នាអំពីព្រឹត្តិការណ៍

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានកិត្តិយសសូមគោរពជម្រាបជូនដំណឹង ដល់សាធារណជនទូទៅ មេត្តាជ្រាបថា៖ តាមការសម្រេចរបស់រាជរដ្ឋាភិបាល ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងកំណត់ការរៀបចំ «ទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍» ជាប្រចាំឆ្នាំ។ សម្រាប់ឆ្នាំ២០២៣នេះ «ទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍» នឹងត្រូវធ្វើឡើងនៅថ្ងៃអាទិត្យ ទី២៦ ខែមីនា ឆ្នាំ២០២៣ ដោយកត់ត្រាជាកាលប្បវត្តិ ឆ្នាំទី១ នៃការរៀបចំព្រឹត្តិការណ៍។

ក្នុងឱកាសនៃការរៀបចំទិវាជាតិលើកទី១ដ៏មានសារៈសំខាន់នេះ ក្រសួងនឹងរៀបចំឱ្យមានការតាំងពិព័រណ៍ ក្រោមប្រធានបទ «ពិព័រណ៍វិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជា-អន្តរជាតិ លើកទី១ ២០២៣» ចាប់ពីថ្ងៃទី ២៦ ដល់ថ្ងៃទី២៨ ខែមីនា ឆ្នាំ២០២៣ នាមជ្ឈមណ្ឌលសន្និបាត និងពិព័រណ៍កោះពេជ្រ។

ដើម្បីកុំឱ្យឱកាសដ៏មានអត្ថប្រយោជន៍ប្រកបដោយចក្ខុវិស័យ និងការអភិវឌ្ឍយូរអង្វែងរបស់កម្ពុជាលើផ្នែក វិទ្យាសាស្ត្រ បច្ចេកវិទ្យា និងនវានុវត្តន៍ ត្រូវរំលងផុត ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានសេចក្តីរីករាយសូមអញ្ជើញបណ្ដាក្រុមហ៊ុន សហគ្រាស អាជីវកម្ម ផលិតកម្ម ដែលមានការពាក់ព័ន្ធក្នុងទិដ្ឋភាព ឬផ្នែកនៃវិទ្យាសាស្ត្រ បច្ចេកវិទ្យា និងនវានុវត្តន៍ ចូលរួមគាំទ្រ និងដាក់តាំងបង្ហាញនូវផលិតផល-សេវាកម្មរបស់ខ្លួន ឱ្យបានច្រើនកុះករ។

«ពិព័រណ៍វិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជា-អន្តរជាតិ លើកទី១ ២០២៣» នឹងត្រូវរៀបចំ រយៈពេល៣ថ្ងៃ ដោយ៖

• ថ្ងៃទី១ និងថ្ងៃទី២ សម្រាប់ការងារពាណិជ្ជកម្ម វិនិយោគ ការពិភាក្សាផ្លាស់ប្តូរគំនិត បង្កើតគំនិតថ្មី សិក្សា ស្រាវជ្រាវ និងការចូលរួមសហការគ្នាផ្សេងៗ
• ថ្ងៃទី៣ សម្រាប់សាធារណជនទូទៅ។

ចំពោះព័ត៌មានលម្អិត សូមធ្វើការទំនាក់ទំនង មកអគ្គនាយកដ្ឋានកិច្ចការទូទៅ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តាមរយៈទូរសព្ទលេខ 017 555 799 / 012 962 296 / 098 826 333